شبابيك مفتوحة للكلام. عربيات ماشية بسرعة , الشوارع مغسولة و الناس بتجري في كل الاتجاهات . تتشبك الأصوات و تغزل دوشة منظمة . هوا بارد و طرطشة منين؟ معرفش ! البلطو يتلون و في القهاوي المهجورة النور بيخف كل أما بتغيب عن عيني من شباك المشروع . صوت الضحك بيتلاشي مع صوت البحر. دايما البحر و ضحاياه . علي قمة الشارع بنفض الألوان من علي البلطو و أتنهد . مين بينشر ستاير قلبة ع المالح كدة زيي؟ أهو كله كلام و هجص! مين بيفتح شبابيك روحه ع البحري كدة زيي؟ حلوة البلوجات . علشان اتكلم و خلاص . أرجع تاني أقول لمجرد القول . راحة الفضفضة . و تخليد اللحظة في الفضاء السيبرنتي الهائل ...لحظة في وسط غيرها كتيرو كل واحد عنده أسبابه.
غريبة ! كتير بيعتقدوا ان الواحد لما بيعيش لحظات السعادة مبيبقاش محتاج يكتب عنها لكن انا كنت بكتب و كنت دايما بلاقي حاجات أقولها . تفاصيل . أنا احب التفاصيل اوي . كنت بكتب عن كسرة فكم قميص أو شعرة وقعت فكباية الماية او ممكن أكتب عن طعم الحاجات . النعناع الأخضر و القرنفل و الملح. و الروايح . ريحة القهوة الزيادة في الشتا أو زيت زهرة الليمون مع ريحة جلدي أو ريحة البحر ناحية الحلقة . بكتب عن حاجات بسيطة . ممكن تحصل بعفوية من حد . و بعفويتها تخليني أتنهد أو أبتسم. كان زمان لما كان عندي العيون اللي بتبتسم من جوا لبره مش من فوق الوش ، الأبتسام كان له معني. لسة كنت بقول لنفسي طيب ما انتي لسة بتعرفي تعملي فنجان قهوة أستاذ . و كمان بتعرفي تعملي النجمة ام ديل . أيه اللي بيحصل يخلي كل حاجة تتهد علي دماغك و مش بتقع عليها تموتك لا بتختفي زي بيوت الدخان اللي بتبنيها طول ما أنتي قاعدة بتدخني بتندفن جواكي. مش عايزة أقعد في الركن و أعيط ( بس و الله فكرة مريحة) و مش عايزة أقول جمل عامة . داخل فيها كلمات كبيرة زي الصدق و الحقيقة و الحب و الجمال و الصداقة و العدالة و المجتمع كل حاجة بقت إن صح التعبير
under rated
لا لا لا بلا ش الدراماتيكية دي . الأيام مش بتعيد نفسها . كنت بزهق لما كلامي يبقي شبه بعضه و الأيام شبه بعضها و نفس الناس لكن الناس مبزهقش منها بسهوله . دلوقتي بجد مفيش حاجة شبه بعضها . لأول مرة بزهق من الناس . مش ملل لكن أحساس مش عارفه أوصفه و ده مخيف . جديد و مخيف .
شفت ستات كتير هما بس اللي رقصوا في المارش العسكري الخاص بيهم . بس بدأت أحس أني بتدرب ع الرقصة . يا دوب انا هانت 27 . يارب أكون قدها و أقدر أتحمل الشرف الكبير ده ! بس الأول و تخليصا لمشكلتي اللي بتتشكل في اني مش بعرف اطلع الغضب بسهولة و ببلعة زي الشربة المرة لحد ما قاولوني باظ. أحب بس أستغل البلوج أستغلال بشكل جديد عليا . و أقول لكل الشخصيات و المواقف و الأيام و الأحداث اللي ضغطت علي أعصابي و ف كل مرة كان نفسي أصرخ فيها و رسمت أبتسامة بالعافية علي وشي و علشان كل الردود اللي كان نفسي أردها و كل الألمة اللي كان
نفسي ألطشها و كل السباب اللي مبقدرش أقولة و كل الدموع اللي اتبكت من جوا ... أحب أقول
salute
و
cheers
و في صحتكم.
طب و بعدين؟ _
و لا قبلين !
